കുട്ടികള്‍ക്ക് സ്വയം നിലനിര്‍ണ്ണയം ചെയ്യാനുള്ള ഒരുക്കങ്ങള്‍

• ക്ളാസിലെ ഭിന്ന നിലവാരക്കാരായ കുട്ടികളും
• സ്കൂളുകളുടെ/ ക്ളാസ്‌‌മുറികളുടെ ഭിന്ന നിലവരവും
• ഭിന്ന വിഷയങ്ങളില്‍ ഒരേകുട്ടിക്കുള്ള നിലവാര വ്യത്യാസവും
  എല്ലാം നമ്മുടെ വിദ്യാഭ്യാസരംഗത്തെ പൊതുപ്രശ്ന ചര്‍ച്ചകളില്‍ ഗൗരവമായി കടന്നുവരുന്നില്ല എന്ന കുഴപ്പം ചെറുതല്ല. സങ്കീര്‍ണ്ണമാണ്` പ്രശ്നവും അതുകൊണ്ടുതന്നെ പ്രശ്നപരിഹാരവും

എന്നത് നാമേറ്റെടുക്കേണ്ട വെല്ലുവിളിയാണ്`. ഈ അവധിക്കാലത്ത് നാം അദ്ധ്യാപകര്‍ ഇക്കാര്യത്തില്‍ അല്പം സമയം ഇതിന്നായി നീക്കിവെക്കുമോ?

പാഠപുസ്തകങ്ങളിലും അദ്ധ്യാപന സഹായികളിലുമായി ഓരോയൂണിറ്റിന്റേയും [ എല്ലാ വിഷയങ്ങളിലും ] ഉദ്ദേശ്യലക്ഷ്യങ്ങളും ഉള്ളടക്കവും പഠനതന്ത്രങ്ങളും മൂല്യനിര്‍ണ്ണയ ഘടകങ്ങളും സവിശദമായി പറഞ്ഞുവെക്കുന്നുണ്ട്. സംസ്ഥാനത്തെ പൊതു നിലവാര രേഖ യായി ഇതിനെയാണ്` പരിഗണിക്കുക. ഇതെത്രമാത്രം ഓരോ ക്ളാസിലും പ്രവര്‍ത്തിപ്പിക്കുന്നുണ്ട് എന്നത് ചര്‍ച്ച ചെയ്യേണ്ടകാര്യമേ ഇല്ല. സ്കൂള്‍ / ക്ളാസ് റൂം സാധ്യതകള്‍, അധ്യാപകരുടെ മികവിലെ ഏറ്റക്കുറച്ചിലുകള്‍ , ഔദ്യോഗിക സംവിധാനങ്ങളുടെ പരാധീനതകള്‍ തുടങ്ങിയ ഘടകങ്ങള്‍ ഇതിനെ ബാധിക്കുന്നുണ്ട് എന്ന് എല്ലാവര്‍ക്കുമറിയാം. അതെല്ലാം പരിഹരിക്കപ്പെട്ടതിനു ശേഷം ഇക്കാര്യം ആലോചിക്കാനാവുകയുമില്ല.

പ്രധാനമായും ഓരോ വിഷയങ്ങളെ സംബന്ധിച്ചും
മൂന്നു ടൈപ്പ് കുട്ടികളെ കാണാം. മിടുക്കരായവര്‍, ഇടത്തരക്കാര്‍ , പിന്നാക്കക്കാര്‍ . ഈ മൂന്നു ഗ്രൂപ്പ് കുട്ടികളേയും മുന്നില്‍ കണ്ടാവണം 'സ്വയം നിലനിര്‍ണ്ണയ പ്രവര്‍ത്തനങ്ങള്‍ '

• ഇത് കുട്ടികള്‍ സ്വയമേവ ഏര്‍പ്പെടുന്ന ഒരു പ്രവര്‍ത്തനമാണ്`
• തന്റെ നിലവാരം തിരിച്ചറിയാനും മെച്ചപ്പെടുത്താനുമുള്ള സ്ളോട്ടുകള്‍ ഈ പ്രവര്‍ത്തന സംഘാതത്തിലുണ്ടാവണം
• സ്കൂളിലെ ഒരു നിര്‍ബന്ധ പരീക്ഷയുടെ സമ്പ്രദായങ്ങളൊന്നും ഇതിലുണ്ടാവരുത്
• പുതിയൊരു വിഷയം പഠിപ്പിക്കുകയല്ല; മറിച്ച് തനിക്കീ സംഗതികള്‍ അറിയില്ലല്ലോ എന്ന തിരിച്ചറിവും അറിയേണ്ടതാണെന്ന ആവശ്യകതാ ബോധവും ഈ പ്രവര്‍ത്തനങ്ങളിലൂടെ ലഭ്യമാക്കണം
• പരിഹാരബോധനം / അധികപഠനം തുടങ്ങിയ സാധ്യതകള്‍ തുറക്കുന്നതായിരിക്കണം പ്രവര്‍ത്തനങ്ങള്‍
• സ്കൂള്‍ സമയത്തോ പുറം സമയത്തോ / വീട്ടിലോ വഴിയിലോ ക്ളസസില്‍ ഒഴിവു സമയത്തോ / ഒറ്റക്കോ കൂട്ടായോ/ സ്വയമൊ പരസാന്നിധ്യത്തോടെയോ ഒക്കെ ചെയ്യാവുന്ന ചെറിയ രസകരങ്ങളായ പ്രവര്‍ത്തനങ്ങളായിരിക്കണം

ഇതിന്നായി ഒരുക്കുന്ന ഇടങ്ങള്‍ കുട്ടിയെ മുന്‍കൂട്ടി അറിയിക്കണം

അദ്ധ്യാപകന്‍ / രക്ഷിതാവ് / പ്രാദേശികമായ വായനശാല, ക്ളബ്ബുകള്‍/ പ്രാദേശിക പഠനകേന്ദ്രങ്ങള്‍ / പ്രാദേശിക ചാനലുകള്‍ / അതത് സ്ഥലങ്ങളിലെ വിദ്യാഭ്യാസ പ്രവര്‍ത്തനങ്ങള്‍ അജണ്ടയായിട്ടുള്ള സന്നദ്ധ സംഘടനകള്‍ തുടങ്ങിയവയുടെ സഹകരണം ഉണ്ടാക്കിയെടുക്കണം.

ബ്ളോഗുകള്‍ , ഫേസ്ബുക്ക്, റ്റ്വിറ്റര്‍ തുടങ്ങിയവ കൈകാര്യം ചെയ്യുന്ന അദ്ധ്യാപകര്‍. കുട്ടികള്‍ . വിദ്യാഭ്യാസ താല്‍പ്പര്യമുള്ളവര്‍ മുതലായവരുടെ സഹകരണം ഉറപ്പാക്കണം

ഓരോ സ്കൂള്‍ കാച്ച്മെന്റ് ഏരിയയിലും ഇക്കാര്യങ്ങളില്‍ ഇടപെടാന്‍ ശേഷിയുള്ള ചെറിയ ഗ്രൂപ്പുകള്‍ ഉണ്ടാക്കാവുന്നതാണ്`.

• അനുപചാരികമായ ചെറിയ എഴുത്തു പരീക്ഷകള്‍
• പാലാക്കട് ജില്ലയിലെ 'ഹരിശ്രീ പോലുള്ള വെബ്ബ് സൈറ്റുകള്‍
• വിദ്യാബ്ളോഗുകള്‍
• ഫേസ്‌‌ബുക്ക് ഗ്രൂപ്പുകള്‍
• റ്റ്വിറ്റര്‍ പോലുള്ള സംവിധാനങ്ങള്‍
• ക്വിസ്സുകള്‍
• രചനാ മത്സരങ്ങള്‍
• കളികള്‍
• ചുമര്‍ പത്രങ്ങള്‍
• നോട്ടിസ് ബോര്‍ഡ്
• അസംബ്ളിപോലുള്ള സ്കൂള്‍ സംവിധാനങ്ങള്‍

എന്നിവയും മറ്റു സാധ്യതകളും ആലോചിക്കാനാവും. എല്ലാവരും കൂടിയും ഒറ്റഒക്കൊറ്റക്കും ആലോചിക്കാം. അറിഞ്ഞ് കാര്യങ്ങള്‍ ചെയ്യാം. ചെയ്യണം.

മികച്ച നിലവാരമുള്ള വിദ്യാഭ്യാസം വ്യക്തിപരമായ ഒരു കാര്യമെന്നതിനപ്പുറം ഒരു സമൂഹത്തിന്റെ മുഴുവന്‍ ആവശ്യമാകുന്ന അവസ്ഥ വരണം . ഇന്ന് പലപ്പോഴും അതില്ല. കുട്ടി എസ്.എസ്.എല്‍.സി പരീക്ഷ ജയിച്ചാല്‍ ആഘോഷവും അനുമോദനവും സ്കൂള്‍ കേന്ദ്രീകരിച്ചാണ്`. ജയിച്ച കുട്ടിയുടെ വീടിന്റെ അയല്പ്പക്കത്ത് ഒരാഘോഷവുമില്ല. ഒരനുമോദനവുമില്ല. ഒരു കുട്ടി ജയിക്കുമ്പോള്‍ അത് ആകുട്ടിയുടെ ജയം മാത്രമല്ല ആ നാടിന്റെ വിദ്യാഭ്യാസ മികവിന്റെ ബാരോമീറ്ററില്‍ ഒരു പോയിന്റ് കയറുകയാണ്`. നാടിന്റെ വികസനത്തിന്റെ വളര്‍ച്ചാ സൂചകമാണ്`.