പുതുവര്‍ഷം...

കേരളത്തിലെങ്കിലും സ്കൂള്‍ തുറക്കുന്നത് സമൂഹം മുഴുവന്‍ അറിയുകയും ഒരുങ്ങുകയും ചെയ്തുകൊണ്ടാണ്`. നല്ല കുട്ടിയും നല്ല രക്ഷിതാവും നല്ല അദ്ധ്യാപകരും നല്ല കച്ചവടക്കാരനും നല്ല ഡൈവറും ഒക്കെ ആകാനുറയ്ക്കുന്ന അവസരമാണ്` ജൂണ്‍ ഒന്ന് . ചിലര്‍ ആ ഉറപ്പുകള്‍ വര്‍ഷമുടനീളം പാലിക്കും; ചിലര്‍ പാതിവഴിയില്‍ നിര്‍ത്തും. സ്വയം നന്നാവാനുള്ള പ്രതിജ്ഞകള്‍ ജനുവരി ഒന്നിനേക്കാള്‍ കേരളത്തിലെങ്കിലും ജൂണ്‍ ഒന്നിനാണ് [സ്കൂള്‍ തുറക്കുന്നേരം ] എടുക്കപ്പെടുന്നത്. അതില്‍ത്തന്നെ അദ്ധ്യാപകന്റെ പുതുവര്‍ഷ പ്രതിജ്ഞ സമൂഹത്തിന്ന് അത്യധികം പ്രയോജനം ചെയ്യും. സ്കൂളിനകത്തും പുറത്തുമായി നടപ്പാക്കപ്പെടുന്ന ഈ പ്രതിജ്ഞ വരും തലമുറയ്ക്കാണ്` ഊര്‍ജ്ജം നല്‍കുന്നത്. ഭാവിയെ ഭാസുരമാക്കുകയാണ്`.

'നല്ല അദ്ധ്യാപകനാവാനാണ്`' ആദ്യ തീരുമാനം. നല്ല അദ്ധ്യാപകന്‍ / ടീച്ചര്‍ എന്ന മുദ്ര ആദ്യം ലഭിക്കുന്നത് [ ലഭിക്കേണ്ടതും ] കുട്ടിയില്‍നിന്നാണ്`. പിന്നെ രക്ഷിതാവ് 'നല്ല മാഷെന്ന് / നല്ല ടീച്ചറെന്ന് ' തിരിച്ചറിയും. സഹാധ്യാപകരും സര്‍ക്കാരും ഒക്കെ
പിന്നെയാണ് ഇക്കാര്യം സമ്മതിക്കുക. എന്നാല്‍ എന്തൊക്കെയാണ് ഈ നന്മ? അതെത്രമാത്രം നമുക്കുണ്ടെന്ന് അളന്നുവെക്കാമോ?

ref: http://learningpointnew.blogspot.in/2012/05/5.html

സ്വയം അളക്കണം

3=ഏറ്റവും നല്ല നില, 2= നല്ലത് , 1= മെച്ചപ്പെടണം X മാര്‍ക്ക് ചെയ്യൂ.

കാര്യങ്ങള്‍ തിരിച്ചറിഞ്ഞ് സ്വയം പരിഹരിക്കണം

നമ്പ്ര്	ഞാന്‍ / എന്നെ/ എനിക്ക് ..........	3	2	1
1	സ്കൂള്‍ / ജോലി എനിക്ക് വളരെ പ്രിയപ്പെട്ടതാണ്
2	നേരത്തേ സ്കൂളിലെത്തും
3	ലീവാണെങ്കില്‍ തലേന്നെങ്കിലും കുട്ടികളോട് പറയും
4	ലീവ് കഴിഞ്ഞ് വന്നാലെങ്കിലും [ നേരത്തെ പറയാനായില്ലെങ്കില്‍ ] ലീവെടുത്ത കാര്യം എന്റെ കുട്ടികളോട് പറയും
5	സ്വന്തം അനുഭവങ്ങള്‍ ക്ലാസില്‍ പങ്കുവെക്കും
6	ക്ലാസില്‍ എത്താന്‍ ഒട്ടും വൈകിക്കില്ല
7	ഇപ്പോള്‍ എല്ലാ കുട്ടികളേയും എനിക്കറിയാം
8	കുട്ടികളുടെ കഴിവുകള്‍ / പരിമിതികള്‍ എനിക്കറിയാം
9	കുട്ടികള്‍ക്ക് എന്നെ വിശ്വാസമുണ്ട്
10	കുട്ടികളുടെ ആവശ്യങ്ങള്‍ / പ്രശ്നങ്ങള്‍ അന്വേഷിച്ച് സഹായിക്കും
11	ഒരിക്കലും കുട്ടികളെ കളിയാക്കുകയോ ചീത്ത വിളിക്കുകയോ മടുപ്പിക്കയോ ചെയ്യില്ല
12	കുട്ടികളെ നന്നായി പ്രോത്സാഹിപ്പിക്കും. ഇനിയും മെച്ചപ്പെടാനുള്ള വഴികള്‍ കാണിച്ചു കൊടുക്കും
13	തലേന്നെങ്കിലും ടീച്ചിങ്ങ് മാന്വല്‍ പൂര്‍ണ്ണരൂപത്തിലാക്കും
14	പാഠപ്രവര്‍ത്തനങ്ങളൊന്നും ആവര്‍ത്തനമായിരിക്കില്ല. എന്നും പുതുമകള്‍ അന്വേഷിക്കും [ പുതുമ കുട്ടിക്കല്ല; എനിക്കും ]
15	നന്നായി സമയം ചെലവാകുന്നത് ടീച്ചിങ്ങ് മാന്വല്‍ തയ്യാറക്കാനാണ്`.
16	കുട്ടികള്‍ ചെയ്ത അസൈന്മെന്റുകള്‍ പരിശോധിക്കാന്‍ ധാരാളം സമയം ചെലവാക്കുന്നുണ്ട്
17	ഏതൊരസൈന്‍മെന്റും നോക്കിക്കൊടുത്താല്‍ കുട്ടി അതുടനെ ഉഷാറായി മെച്ചപ്പെടുത്തി എഴുതിയിരിക്കും
18	കുട്ടി ചെയ്യുന്ന പ്രവര്‍ത്തനങ്ങളെ പരിശോധിക്കുന്നത് അവരുമായി ചര്‍ച്ച ചെയ്തുറപ്പിച്ച മൂല്യനിര്‍ണ്ണയ സൂചകങ്ങള്‍ വെച്ചിട്ടാണ്
19	ഒന്നോ രണ്ടോ ദിവസങ്ങളില്‍ ചെയ്യാനുള്ള പ്രവര്‍ത്തനങ്ങള്‍ മുന്‍കൂറായി കുട്ടിയുമായി ചര്‍ച്ചചെയ്യും
20	ഗൃഹപാഠങ്ങള്‍ നാളേക്കുള്ള ഒരുക്കങ്ങളായിരിക്കും
21	വിരസമായ ആവര്‍ത്തനം ഒരിക്കലും ഉണ്ടാവില്ല
22	കുട്ടിക്ക് സംശയങ്ങള്‍ പരിഹരിക്കാനുള്ള വിവിധ മാര്‍ഗങ്ങള്‍ - ഓരോരുത്തര്‍ക്കും [ എല്ലാവര്‍ക്കും ] ഉണ്ടാക്കിക്കൊടുത്തിട്ടുണ്ട്
23	മുന്‍കൂട്ടി നിശ്ചയിച്ച പ്രകാരം 'ഓരോ കുട്ടിക്കും ഓരോ ദിവസം' [ സവിശേഷ പ്രവര്‍ത്തനങ്ങള്‍ക്ക് ] കൊടുക്കാറുണ്ട്
24	കുട്ടിയെ കുട്ടി എന്ന നിലയിലേ കാണാറുള്ളൂ... അവരേക്കാള്‍ മികച്ചവരുമായി താരതമ്യപ്പെടുത്താറില്ല
25	കുട്ടിക്ക് പഠനകാര്യങ്ങളില്‍ സ്വയം നിലനിര്‍ണ്ണയം ചെയ്യാനുള്ള വിദ്യകള്‍ ഉണ്ടാക്കിക്കൊടുത്തിട്ടുണ്ട് . ക്ലാസിലെ ഓരോ പ്രവര്‍ത്തനത്തിന്റേയും പ്രക്രിയയുമായി സ്വാഭവികമായി ബന്ധപ്പെടുത്തിയാണിത് ചെയ്തിരിക്കുന്നത്
26	തയ്യാറാക്കുന്ന പഠന പ്രവര്‍ത്തനം, പ്രക്രിയകള്‍, മൂല്യനിര്‍ണ്ണയനം, സ്വയം നിലനിര്‍ണ്ണയം, പരിഹാരബോധനം എന്നിവ ഒറ്റ പാക്കേജ് ആയിരിക്കും
27	പഠനപ്രവര്‍ത്തനങ്ങളോരോന്നും സ്വയമേവ അധിക പഠനത്തിലേക്ക് നയിക്കുന്നതായിരിക്കും
28	സഹപ്രവര്‍ത്തകരുമായി എല്ലാ കാര്യങ്ങളും ചര്‍ച്ച ചെയ്ത് മികവുറ്റതാക്കും
29	ലാബ് ലൈബ്രറി ക്ലബ്ബ് പ്രവര്‍ത്തനങ്ങള്‍ പഠനപ്രവര്‍ത്തനങ്ങള്‍ തന്നെയാണ്
30	ക്ലാസനുഭവങ്ങള്‍ എന്നും ഡോക്യുമെന്റ് ചെയ്യുന്നുണ്ട്

അദ്ധ്യാപകന്റെ സ്വയം നിലനിര്‍ണ്ണയം തന്നെയാണിത്. അതു പങ്കുവെക്കാനായാല്‍ നമ്മുടെ വിദ്യാഭ്യാസ രംഗം അനുപമമായ വളര്‍ച്ച നേടും എന്നു സംശയമില്ല.