കെണി

കെണി ഒരുക്കിയിരിക്കയണു
അതെ സാക്ഷാല്‍ കെണി!
എയര്‍ടെല്‍
ബി.എസ്.എന്‍.എല്‍
ഐഡിയ
റിലയന്‍സ്
(സിം ഫ്രീ ആണല്ലോ)
എല്ലാം മേശപ്പുറത്ത് സജീവം.
ആരാണു വിളിക്കുക എന്നറിയില്ലല്ലോ
ഒരു കാളും മിസ് ആവരുത്
ഒരു സൗജന്യവും അറിയാതെ പോകരുത്
ഒരു എസ്.എം.എസും
നഷ്ടമാവരുത്
ഇനി ടാറ്റയും, എം.ടി.എസ് ഉം കൂടി
വാങ്ങും.
സൗജന്യങ്ങള്‍
കെണി വെച്ചു പിടിക്കും.

നിത്യം;അനിത്യം

രാവിലെ എഴുന്നേറ്റ്
ചായ,ചോറു,കറി,അലക്ക്....
നിത്യപ്രവൃത്തികള്‍
എന്നും.എന്നും.
ഒഴിവുസമയങ്ങളില്‍(?)
വായന, എഴുത്ത്,തുന്നല്‍....
എപ്പോഴെങ്കിലും.
അനിത്യപ്രവൃത്തികള്‍.
നിത്യമല്ല; അനിത്യമാണു
ജീവിതത്തെ അര്‍ഥപൂര്‍ണ്ണമാക്കുന്നത്!

ത്രികാലം

1.ഭാവി

ഏറ്റവും പ്രിയപ്പെട്ടത്
കേൾക്കാനിരിക്കുന്ന ഗാനം
വായിക്കാനിരിക്കുന്ന കൃതി
അക്കരെ പച്ച.
ഏറ്റവും പ്രിയപ്പെട്ടത്
ഉണ്ണാനിരിക്കുന്ന ചോറ്
കൂട്ടാനിരിക്കുന്ന കറി.

2.വർത്തമാനം

ഏറ്റവും പ്രിയപ്പെട്ടത്
സ്വന്തം ഭാര്യ.
ഏറ്റവും പ്രിയപ്പെട്ടത്
സ്വന്തം മുഖം
സ്വന്തം ശരീരം.

3.ഭൂതം.

ഏറ്റവും നല്ല കാലം ഭൂതം.
അതല്ലോ കൈവിട്ടുപോയതും.

ചക്കളത്തിപ്പോരാട്ടം

എണ്ണയാട്ടുന്ന ചക്ക്
ചക്ക് സ്ഥാപിച്ചിരിക്കുന്ന ഇടം ചക്കളം.
എണ്ണയാട്ടുന്നത്
ചക്കാനും ചക്കാലത്തിയും.
സന്തോഷമായി.
പക്ഷെ,
ഏതു സന്തോഷത്തിലും
ചില പൊല്ലാപ്പുകള്‍ ഉണ്ടാവാം...
ഇരുവരും കലഹിക്കും...
ചോറു വെന്തില്ല...കുട്ടികളെ കുളിപ്പിച്ചപ്പോള്‍
തല നേരേ തുവര്‍ത്തിയില്ല...
പരസ്ത്രീഗമനം....
പിന്നെ അടിയാണു...
അടികൊണ്ട ചക്കാലത്തി കരഞ്ഞു വീട്ടിനകത്തേക്ക് ഓടിക്കയറും...
ചക്കാന്‍ എണ്ണതുടയ്ക്കുന്ന തുണിയുമായി പിന്നാലെ..
വീട്ടിനകത്ത് ബഹളം...
അടി....ഇടി...
എണ്ണത്തുണി പിഴിഞ്ഞ് ഭരണിയില്‍ ഒഴിച്ചുവെച്ച്
വീണ്ടും ഇരുവരും
ചക്കളത്തില്‍ എണ്ണയാട്ടല്‍ തുടരും..
വീണ്ടും കലഹം
അടി
എണ്ണത്തുണി
പിഴിഞ്ഞൊഴിക്കല്‍
എണ്ണ ആട്ടിക്കഴിഞ്ഞു
എണ്ണ അളന്നുകൊടുത്ത്
കൂലി വാങ്ങി
കലഹം മറന്നു,
വീട്ടിനകത്ത് ശേഖരിച്ച എണ്ണ
അളന്നെടുത്തുവെക്കും.
അതെ കലഹങ്ങളൊക്കെ
എണ്ണയുടെ അളവ്
വര്‍ദ്ധിപ്പിക്കും!
സ്നേഹം വളര്‍ത്തും.
സ്നേഹം എന്നതിനു എണ്ണയെന്നും അര്‍ഥം
പണ്ടേ ഉണ്ട്!

വിവേകി

പറന്നുവന്നു
മലര്‍ന്നു വീഴും.
പിന്നെ,
കുറേ നേരം കിടന്നു വെപ്രാളപ്പെട്ട്
കമിഴും.
വീണ്ടും പറക്കും...വീഴും...മലരും...കമിഴും...
വീണ്ടും..
ഇതുതന്നെ.
ഒരുകാര്യം ഉറപ്പ്-
കൊമ്പന്‍ചെല്ലി
സ്വന്തം ജീവിതമല്ല;
ആരാരുടേയോ ജീവിതം വ്യാഖ്യാനിക്കുകയാണു.

'അന്യനുതകി സ്വജീവിതം
ധന്യമാക്കുമമലേ,
വിവേകികള്‍'

കിളികള്‍ ചെയ്യുന്നത്

ചിറകുറച്ച് പറന്ന കിളി
കൂടിനെ ഓര്‍ക്കുന്നില്ല
പുതിയ കൂടുകള്‍
നിര്‍മ്മിക്കുന്നതിലാണു
പിന്നീടതിനു മനസ്സ്.
കിളികള്‍ വിതയ്ക്കുക മാത്രമാണു
കൊയ്യുന്നതാരൊക്കെയോ തന്നെ.

പുതപ്പ്

മഴയുടെ നൂലുകള്‍കൊണ്ട് ഊട്
കുളിരും കാറ്റും തീര്‍ത്ത പാവ്
വരിഷര്‍ത്തുവിന്റെ പുതപ്പ്!!


*

നിര്‍ദ്ദേശങ്ങള്‍ പാലിക്കുമ്പോള്‍

നടക്കുമ്പോള്‍
നേരേ നിവര്‍ന്നു നടക്കണേ
ഇരിക്കുമ്പോള്‍ നേരേ നിവര്‍ന്ന് ഇരിക്കണേ
കിടക്കുമ്പോള്‍ നേരേ നിവര്‍ന്ന് കിടക്കണേ
ഉണ്ണുമ്പോള്‍...
സംസാരിക്കുമ്പോള്‍.....
വാങ്ങുമ്പോള്‍....
കൊടുക്കുമ്പോള്‍....
പക്ഷെ,
നടക്കുമ്പോള്‍ ഒന്നു കുനിഞ്ഞു നടക്കുന്നതാ സുഖം
ഇരിക്കുമ്പോള്‍ ഒന്നു ഒടിഞ്ഞിരിക്കുന്നതാ സുഖം
കിടക്കുമ്പോള്‍ ഒന്നു ചുരുണ്ട് നാട്ടയില്‍ കൈ തിരുകി ചെരിഞ്ഞു....
ഉണ്ണുമ്പോള്‍..
...
നിര്‍ദ്ദേശങ്ങള്‍...
ഒക്കെ നന്നവാനണല്ലോ..
നന്നാവുമ്പോള്‍...

പിറകെ

ജലനീലിമയെ കുറിച്ച്
പറയുന്നതൊക്കെ
ആകാശനീലിമയുടെ
പ്രതിഫലനം
എന്നാണു.
ആകശനീലിമ
കടല്‍ജലത്തിലെ
തിരയിളക്കവും
ജലത്തിളക്കവും
കൊണ്ടെന്ന് ചിന്തിക്കുന്നേ ഇല്ല.
കവികള്‍ പോലും.
സ്ഥിതിയുള്ള ജലമല്ല:
ശൂന്യമായ ആകാശമാണല്ലോ
നമുക്ക് സത്യം!

മഹാപദ്മാടവീസംസ്ഥാ