school notes 13

 

അദ്ധ്യാപന നൈപുണികൾ 13

[വിജ്ഞാനവും ചിന്തയും ]

കുട്ടിയുടെ ഭാഷാവികാസം വൈജ്ഞാനികവികാസവുമായും ചിന്താശേഷിയുടെ വളർച്ചയുമായും ബന്ധപ്പെട്ടാണിരിക്കുന്നത്. ഊഹിക്കുക, ഭാവനയിൽ കാണുക, പ്രവചിക്കുക, വിവരിക്കുക,വർണ്ണിക്കുക എന്നിങ്ങനെ പഠിതാവിന്റെ ചിന്താശേഷി ചടുലമായും സർഗാത്മകമായും ഉപയോഗപ്പെടുത്തുന്നതിന്ന് അവസരം ലഭിക്കുന്ന പ്രവർത്തനങ്ങളിൽ പങ്കെടുക്കാൻ കുട്ടികൾക്ക് സാധിക്കണം. [ 303/ പി ഡി എഫ്. പേജ്: 22 ]നാമിതിനെ കാണേണ്ടത് കുട്ടിക്കുള്ള നൈപുണികൾ എന്നനിലയിൽ ചുരുക്കിയല്ല, അദ്ധ്യാപികക്കും എപ്പോഴും കൈവശം വേണ്ടതും സ്ഥിരമായി നവീകരിക്കേണ്ടതുമായവ എന്ന നിലയിലാണ്.

വിജ്ഞാനം ചിന്തയുടെ ഫലവും ചിന്ത വിജ്ഞാനത്തിന്റെ ഫലവുമാണ്. കാര്യകാരണബന്ധത്തിന്റെ പാരസ്പര്യം. ചിന്തയില്ലാതെ അറിവില്ല [ വിവരം / ഡാറ്റ അല്ല ] . അറിവില്ലാതെ ചിന്ത സാധ്യമല്ല. ചിന്താപ്രക്രിയകളാണ് ഊഹിക്കുക, ഭാവനയിൽ കാണുക ... തുടങ്ങിയവ. ഫലം പുതിയ ജ്ഞാനമാണ്. ഈ ജ്ഞാനം പുതിയ ചിന്തകളിലേക്ക് ചടുലമായി പ്രവേശിക്കുന്നു. ഇത് സാധ്യമാക്കലാണ് പഠനം.

അക്കാദമികമായി ഈ പ്രക്രിയകൾ നമുക്കും ബാധകമാണ്. പഠിച്ചു കഴിഞ്ഞല്ല പഠിപ്പിക്കൽ. പഠിപ്പ് കഴിഞ്ഞല്ല പയറ്റ്. പഠിപ്പും പയറ്റും സമകാലത്തിലാണ്. [സഹപഠിതാവെന്ന സങ്കൽപ്പം ]

ക്ളാസിൽ നൽകുന്ന പ്രവർത്തനക്കൂട്ടങ്ങളിലൂടെയാണിത് സാധ്യമാക്കുന്നത്. പ്രവർത്തനങ്ങൾ പ്ളാൻ ചെയ്യുന്നത് എത്രമാത്രം പ്രാധാന്യമുള്ളതാണെന്ന് ഇത് കാണിക്കുന്നു. ആക്ടിവിറ്റികളുടെ സ്വഭാവത്തെ വിശദീകരിക്കുന്ന ഭാഗത്ത് ഇത് കാണാം. തുടർച്ചയാണ് ആക്ടിവിറ്റികളുടെ പ്രധാന സ്വഭാവം. തുടർച്ച നിശ്ചയിക്കുന്നത് പാഠ / യൂണിറ്റ് ഉള്ളടക്ക ഭാഗവും. അറിവിനെ കേന്ദ്രീകരിച്ചുമാത്രമാണിത്. പരീക്ഷാകേന്ദ്രിതമായി മനസ്സിലാക്കരുത്. അറിവ് ഏതു പരീക്ഷയിലും വിജയം സ്വാഭാവികമാക്കും. മറിച്ചാണെങ്കിൽ പരീക്ഷ കഴിയുന്നതോടെ ജ്ഞാനം ഭാരമായി വരും. ഭാരം ഒഴിവാക്കലാണല്ലോ മനുഷ്യ സ്വഭാവം.

[ പ.ലി : പാഠപുസ്തകം കുട്ടിക്ക് മാത്രമല്ല, നമുക്കുകൂടിയാണ്. പഠിക്കാൻ !! ]

school notes 10

 

അദ്ധ്യാപന നൈപുണികൾ

ജ്ഞാനനിർമ്മിതിയിൽ അധിഷ്ഠിതമായ ക്ളാസ് മുറിയിൽ കടങ്കഥകൾ കൊണ്ട് എന്ത് പ്രയോജനം എന്ന് ആലോചിക്കാവുന്നതാണ്. ഡിപി ഇ പി യുടെ തുടക്കത്തിൽ കടങ്കഥക്കും പഴഞ്ചൊല്ലിനും ഭാഷാക്ളാസുകളിൽ വലിയ പ്രയോഗങ്ങളുണ്ടായിരുന്നല്ലോ. ഇപ്പോൾ തീരെ കുറഞ്ഞിട്ടുണ്ട്.

ഭാഷാവികാസത്തിന്റെ ചരിത്രപഠനത്തിലും ഭാഷാപ്രയോഗങ്ങളുടെ വിചിത്രസാധ്യതകളിലും സാമ്സ്കാരിക പഠനത്തിലും കടങ്കഥകൾക്ക് ചിലത് ചെയ്യാനുണ്ട്. പതിപ്പ് നിർമ്മാണമൊക്കെ അതിന്റെഭാഗമായി വരും. എന്നാൽ ക്ളാസ് മുറിയിൽ കടങ്കഥ പയറ്റാണ് ആകർഷകമായി കുട്ടിക്കും ടീച്ചർക്കും തോന്നാറുള്ളത്.

കടങ്കഥപയറ്റിൽ ജ്ഞാനനിർമ്മിതിയുടെ ഒരു പ്രയോഗ സാധ്യതയുമില്ല. വെറും മനപ്പാഠമാണല്ലോ കടങ്കഥയിൽ ഉള്ളത്. നേരത്തെ കേട്ട് ഓർത്തുവെക്കുന്നത് മാത്രം ജയസാധ്യത നൽകും. കടങ്കഥയുടെ അടിസ്ഥാനപ്രശ്നം / മികവ് അതൊരു ഗൂഢഭാഷയാണ്. വ്യക്തിപരമായ യുക്തിയിൽ നിലനിൽക്കുന്നതാണ്. ചോദ്യവും ഉത്തരവും ചോദ്യം ചോദിക്കുന്നയാളിൽ [ നേരത്തേ കേട്ടത് ഓർമ്മയില്ലെങ്കിലോ, ആദ്യമായി കേൾക്കുമ്പൊഴോ ] സ്ഥിതിചെയ്യുന്നു. ചോദ്യവും ഉത്തരവും ശരി / തെറ്റ് തീരുമാനവും എല്ലാം ചോദിക്കുന്നയാളിൽ ഒതുങ്ങുന്നു. ഉത്തരം പറയുന്നയാൾക്ക് ഒന്നും ചെയ്യാനില്ല, ഓർമ്മിക്കുകയെന്നതൊഴികെ.

അധികം ചോദ്യം ചോദിക്കുന്നയാൾക്കാണ് ജയം. ഉത്തരം പറഞ്ഞ് ജയിക്കൽ എളുപ്പമല്ല. ഉത്തരം പറഞ്ഞാലും ജയം നിശ്ചയിക്കുന്നത് ചോദ്യം ചോദിച്ചയാളാണ്. പൊതുവെ ക്ളാസിൽ അധികം പേരും തോൽക്കുകയാണ്ചെയ്യുക. ക്ളാസ് റൂം പ്രവർത്തനങ്ങളുടെ ലക്ഷ്യം എല്ലാവരേയും ജയിക്കാൻ പ്രാപ്തരാക്കുകയാണുതാനും. ഈ വൈരുദ്ധ്യം കടങ്കഥ പയറ്റിലില്ലേ?

പഠനപ്രവർത്തനങ്ങൾ തെരഞ്ഞെടുക്കുന്നതിലും അത് പ്രക്രിയാപരമായി നിർവഹിക്കുന്നതിലും അദ്ധ്യാപികക്ക് ആഴമേറിയ നൈപുണി ഉണ്ടാവണം.

[ പ ലി: കഥപറയുന്നത് മനുഷ്യജീവിതത്തെ വിജയിപ്പിക്കാനാണ് , മുന്നേറാനാണ്. ]

school notes 04

 

school notes 04

 

അദ്ധ്യാപന നൈപുണികൾ

    റഫറൻസിങ്ങ് - അവശ്യം വേണ്ട ഒരു നൈപുണിയാണ്. സ്വന്തം ആവശ്യത്തിനുള്ള റഫറൻസിങ്ങ് , കുട്ടികൾക്ക് റഫറൻസിങ്ങിനു പരിചയമുണ്ടാക്കൽ രണ്ടും പ്രധാനമാണ്. പക്ഷെ, രണ്ടിനും രണ്ട് നയമാണ് സാധാരണ അനുസരിക്കുന്നത് എന്നതാണ് ശ്രദ്ധിക്കേണ്ടത്. 

    സ്വന്തം ആവശ്യത്തിനുള്ള സാമഗ്രികൾ സ്വയം കണ്ടെത്തുന്നവർ ഉണ്ട്. എണ്ണം കുറവാണ്. ഏറ്റവും മികച്ചതും വിശ്വസനീയമായതും കണ്ടെത്തും. ലൈബ്രറിയിൽ നിന്നാണെങ്കിലും നെറ്റിൽ നിന്നാണെങ്കിലും ഏറ്റവും പുതിയത്, വിശ്വസനീയ [ ആധികാരിക] മായത്, ആവശ്യത്തിന്ന് പലവിധ ഡറ്റ ഉള്ളത്, ഉള്ളടക്കത്തെ സംബന്ധിച്ച ഉറപ്പിന്ന് സൈറ്റേഷനുകൾ, റഫറൻസ് നോട്ടുകൾ എന്നിവ ഉള്ളത് ,രേഖ നിർമ്മിച്ച ആളെ / സ്ഥാപനത്തെ ക്കുറിച്ചുള്ള പൂർണ്ണ വിവരങ്ങൾ ഉള്ളത് എന്നിങ്ങനെ പലതും പരിശോധിക്കും.മികവ് തീരുമാനിക്കും.

    സ്വന്തം ആവശ്യത്തിന്ന് പരസഹായം തേടുന്നവർ. ഏത് പുസ്തകം, ഏത് ലൈബ്രറി, എങ്ങനെ കിട്ടും , ആരെക്കാണണം, തനിക്ക് ആവശ്യമുള്ള വിവരം ഏത് ചാപ്റ്ററിൽ, ഏത് പേജിൽ , ഏത് സൈറ്റ്, ലിങ്ക് തരൂ... എന്നുവരെയൊക്കെ അന്വേഷിക്കും. അത് മോശമൊന്നും അല്ല. ഒന്നും ഇല്ലാത്തതിനേക്കാൾ നല്ലത്. റഫർ ചെയ്ത് കണ്ടന്റ് മെച്ചപ്പെടുത്താനുള്ള ആത്മാർഥമായ ശ്രമം നല്ലത് .

    ഉള്ളടക്കം [ കണ്ടന്റ് ] , ക്ളാസ്‌‌റൂം പ്രവർത്തനം, മൂല്യനിർണ്ണയം, സ്വയം വിലയിരുത്തൽ, പരിഹാരബോധനം , മാതൃകാ പരീക്ഷ എന്നിങ്ങനെ പല ആവശ്യങ്ങൾക്കും റഫർ ചെയ്യേണ്ടതുണ്ട്. വിപുലമായ റഫറൻസിങ്ങ് നടക്കുന്നത് മാതൃകാചോദ്യങ്ങൾക്കായാണെന്ന് പൊതുവെ ഒരു പരാധീനത.

    ഏറ്റവും അനാസ്ഥ കുട്ടികളെ റഫറൻസിങ്ങിന്ന് തയ്യാറാക്കുന്നിടത്താണ്. റഫർ ചെയ്യേണ്ട മെറ്റീരിയൽ പറയും. ഒരിക്കലും അത് ലഭ്യമാക്കുന്നതെങ്ങനെ, അതിൽ എന്താണ് സവിശേഷമായി ശ്രദ്ധിക്കേണ്ടത്, ഏത് ചാപ്റ്റർ, ഏത് പേജ്, ഏത് സൈറ്റ്, ഏത് ലിങ്ക്, ഏത് പാരഗ്രാഫ് എന്നൊന്നും കൃത്യമാക്കില്ല. അത് തന്നെയാണോ വേണ്ടത് എന്ന് തനിക്ക് ഉറപ്പില്ല [ സ്വയം നോക്കിയിട്ടില്ല ] . കുട്ടിക്ക് ഒരു പ്രവർത്തനം ക്ളാസ്‌‌മുറിയിലോ വീട്ടിലോ വെച്ച ചെയ്യാനാണല്ലോ അധികവായനാവശ്യം. അന്നന്നത്തെ ആവശ്യമാണ്. മാർത്താണ്ഡവർമ്മ നോവൽ , ബഷീർ കഥകൾ, വിശ്വചരിത്രാവലോകനം, വിക്കിപീഡിയ , ഒക്കെ അധികവായനനക്ക് കൊടുത്തവർ ഉണ്ട്. എന്ത്?എവിടെ? എത്ര ? എന്നൊന്നും കൃത്യമാക്കില്ല. കുട്ടിക്ക് ഒന്നും ചെയ്യാനാവില്ല. കുട്ടിക്ക് റഫറൻസിങ്ങ് പൂജ്യം. ശീലം തന്നെ വളരില്ല.

    തനിക്ക് വേണ്ടത് , ഏറ്റവും ആധികാരികമായത് സ്വയം കണ്ടെത്താനും കുട്ടികളെ പരിശീലിപ്പിക്കാനും അദ്ധ്യാപികക്ക് കഴിയണം. അറിവിന്റെ ആഴങ്ങളിലേക്ക് ചെന്നത്തലാണ് റഫറൻസിങ്ങ് - അദ്ധ്യാപികക്കും കുട്ടിക്കും.

[ പ.ലി: സോഷ്യമീഡിയ വഴി കയ്യിൽ കിട്ടിയത് ഒന്നും നോക്കതെ ക്ളാസിൽ പ്രയോഗിക്കുന്നവരെ കുറിച്ച് ഇവിടെ പരാമർശിക്കുന്നില്ല. ]

school notes 03

 

അദ്ധ്യാപന നൈപുണികൾ

അദ്ധ്യാപന നൈപുണികളെകുറിച്ചുള്ള ഈ കുറിപ്പിൽ തൊഴിൽപരമായ ഒരു മികവ് എന്ന നിലയിൽ ക്ളാസിലെ എല്ലാ കുട്ടികളുടേയും സമഗ്രവികസനം ഉറപ്പാക്കാനും മാത്രമല്ല അവരുടെ മികവുകൾ പ്രദർശിപ്പിക്കാനും അവസരം കൊടുക്കാനുമുള്ള അദ്ധ്യാപക വൈദഗ്ദ്ധ്യത്തെക്കുറിച്ച് ആലോചിക്കുന്നു.

എല്ലാ കുട്ടികളുടെയും - എന്ന് പറയുന്നത് പ്രധാനമാണ്. ഓരോ കുട്ടിയും ഓരോ കുട്ടിയാണ്. ബുദ്ധി [ ബഹുമുഖബുദ്ധി എന്നർഥത്തിൽ ] , സാമൂഹ്യസാംസ്കാരികസാമ്പത്തിക നിലകൾ, പഠനവേഗത, പഠനരീതികൾ , ഭിന്നശേഷിക്കാർ തുടങ്ങി നാനാതരത്തിൽ വ്യത്യസ്തത നിലനിർത്തുന്നവരാണ് ഓരോ കുട്ടിയും. ഒരു ക്ളാസിൽ ഒരു സമയത്ത് ഇരിക്കുന്നു ഒരു അദ്ധ്യാപികയുടെ മുന്നിൽ ഇരിക്കുന്നു എന്നു മാത്രമാണ് സമാനത. 40-45 കുട്ടിയും ഒരദ്ധ്യാപികയും ആണല്ലോ ക്ളാസ് .

40-45 കുട്ടികൾ എന്നത് വലിയൊരു പ്രതിബന്ധമാണ്. 20 ആണ് യുക്തിസഹം. ഒന്നിലധികം അദ്ധ്യാപകർ പങ്കെടുക്കുന്ന പാനൽക്ളാസുകൾ, സാങ്കേതികവിദ്യാസഹായം എന്നിവ സാധ്യമാക്കാൻ നോക്കണം.

ഒരു കണ്ടന്റ് വിനിമയം ചെയ്യാൻ ഒരാക്ടിവിറ്റി എന്നതിനു പകരം ഒരു പാക്കേജ് രൂപത്തിൽ ഒന്നിലധികം ആക്ടിവിറ്റികളുടെ സാധ്യത ആലോചിക്കണം. തനിക്ക് താല്പ്പര്യമുള്ള ആക്ടിവിറ്റി തെരഞ്ഞെടുക്കാൻ [ബഹുമുഖബുദ്ധി അംഗീകരിക്കൽ ] കുട്ടിക്ക് സാധ്യമാകണം. അതെല്ലാം ശരിയായി സൂചകങ്ങൾ വെച്ച് വിലയിരുത്തപ്പെടണം.

ഒരു കഥാസ്വാദനം കുറിപ്പ് - എന്ന ഒറ്റ ആക്ടിവിറ്റി പോര. കഥ ശരിയായി ആഴത്തിൽ ആസ്വദിക്കുന്നു എന്നുറപ്പാക്കാൻ ആസ്വാദനക്കുറിപ്പ് , ഉപന്യാസം എന്ന ഒരാക്ടിവിറ്റിക്ക് പകരം 1) കഥ വായിക്കൽ 2) കഥ കേൾക്കൽ 3) കഥ പുനാവിഷ്ക്കരിക്കൽ 4) തിരക്കഥാരചന 5)വ്യവഹാരം മാറ്റൽ 6) സ്കിറ്റ് തയാറാക്കൽ 7) നാടകീകരണം 8) സ്ളൈഡുകൾ ഉണ്ടാക്കി പ്രദർശിപ്പിക്കൽ 9)മനോചിത്രണം 10) കഥാചിത്രീകരണം 11) ബ്ളോഗിങ്ങ് 12) വീഡിയോ റക്കോഡിങ്ങ് & ഷെയറിങ്ങ് തുടങ്ങി നിരവധി ആക്ടിവിറ്റികൾ ഗ്രൂപ്പുകൾക്ക് തെരഞ്ഞെടുക്കാൻ സാധിക്കണം. ശ്രദ്ധാപൂർവം ഗ്രൂപ്പുകൾ ഉണ്ടാക്കൽ അവയ്ക്ക് ചാക്രികരീതിയിൽ പ്രവർത്തനങ്ങൾ ഏറ്റെടുക്കാനുള്ള സന്നദ്ധത രൂപപ്പെടുത്തൽ എന്നിവ തുടർച്ചയായി ഉണ്ടാവണം. ഗ്രൂപ്പുകൾ സക്രിയമാകാനുള്ള ഇടപെടലുകൾ വേണം. ഓരോ ആക്ടിവിറ്റിയും ഓരോ ചെറുഗ്രൂപ്പ് ഏറ്റെടുത്താൽ ഒന്നോ രണ്ടോ പീരിയേഡ് കൊണ്ട് എല്ലാം അവതരിപ്പിക്കാനും വിലയിരുത്താനും കഴിയും.ഒരു ടേം കണക്കാക്കി പ്ളാൻ ചെയ്താൽ എല്ലാ കുട്ടിക്കും വികാസവും ഉറപ്പാക്കാം.

പ ലി : കുട്ടിയുടെ ശീലങ്ങളിലല്ല, അദ്ധ്യാപകരുടെ ശീലങ്ങളിലാണ് ആദ്യം മാറ്റം വേണ്ടത്.