ഗൃഹപാഠങ്ങൾ

പഠനം നിരന്തരമായി നടക്കേണ്ട ഒരു പ്രവർത്തനമാണ്. സ്കൂളിൽ ക്ലാസിനകത്ത് മാത്രം നടക്കേണ്ട ഔപചാരിക പ്രവർത്തനമല്ല ഇത്. സ്കൂൾ , കളിസ്ഥലം, വീട്, കൂട്ടുകാർ, വായനശാല, ക്ലബ്ബ്, ബസ്‌യാത്ര തുടങ്ങിയ സ്ഥലങ്ങളിലൊക്കെ പഠനം നടക്കുന്നുണ്ട്. പലതും ബോധപൂർവവും മിക്കതും അബോധപൂർവവും ആണെന്ന് മാത്രം. ഗാർഹികാന്തരീക്ഷത്തിലെ പഠനത്തെക്കുറിച്ചുള്ള ചില സംഗതികൾ നോക്കാം .

ജൂൺ ജൂലായ് സ്കൂളിലെ ആദ്യത്തെ രക്ഷാകർത്തൃസമിതിയോഗത്തിന്റെ കാലമാണ്. പി ടി എ കൂടും. സ്കൂളിൽ ഒന്നിച്ചോ ക്ലാസ് പിടിഎകളായോ ഇത് നടക്കും. പി ടി എ കളിലെ സ്ഥിരം അജണ്ടകൾ ഉണ്ടാവട്ടെ. എന്നാൽ രക്ഷിതാവിന്ന് വീട്ടിൽ എങ്ങനെ കുട്ടിയെ സഹായിക്കാമെന്നത് സംബന്ധിച്ച ചില അനുഭവങ്ങൾ ഇപ്രാവശ്യം പി ടി എ കളിൽ ആലോചിക്കണം .

രക്ഷിതാവിന്ന് കുട്ടിയെ പഠനകാര്യങ്ങളിൽ നേരിട്ട് സഹായിക്കാനാവും. അതു നിലവിൽ ക്ലാസ്രൂമിലെ പ്രവർത്തനാധിഷ്ഠിത രീതിയിൽത്തന്നെ. എല്ലാ വിഷയങ്ങളിലും ചിലത് ചെയ്യാനാവും. എല്ലാ രക്ഷിതാവിനും ചിലത് ചെയ്യാൻ കഴിയും. അതിന്റെ ചില മാതൃകകൾ പി ടി എ യിൽ ഉണ്ടാവണം. അദ്ധ്യാപകർ മുങ്കൂട്ടി തയ്യാറെടുപ്പുകൾ നടത്തണം എന്നു മാത്രം.

ഈ രക്ഷാകർത്തൃശാക്തീകരണത്തിന്ന് കുട്ടികളെകൂടി കൂട്ടണം . 10 രക്ഷിതാക്കളും അവരുടെ കുട്ടികളും കൂടി 20-21 പേരുള്ള ഗ്രൂപ്പുകളാക്കണം. തയ്യാറായ ഒരദ്ധ്യാപിക ആഗ്രൂപ്പിൽ കൂടെ കൂടണം. ഇനി വിവിധ പ്രവർത്തനങ്ങൾ – ക്ലാസ് റൂമിൽ പതിവുള്ള പ്രവർത്തനങ്ങൾ ഓരോന്നായി ഈ ഗ്രൂപ്പിൽ ചെയ്യിച്ച് നോക്കൂ .

പ്രവർത്തനങ്ങൾ :

1. കഥയുണ്ടാക്കൽ [ ഒരാൾ ആദ്യം ഒരു വാക്യം. പിന്നീടുള്ളവർ ഒരോരുത്തരായി ഓരോ വാക്യങ്ങൾ കൂട്ടിച്ചേർത്ത് കഥമെനയൽ

2. കവിതകൾ ഈണം കൊടുക്കൽ

3. വിപരീതം പറയൽ [ ഒരാൾ ഒരു വാക്ക് - അടുത്തയാൾ അതിന്റെ വിപരീതം, പര്യായങ്ങൾ, വാക്യപ്രയോഗം, വ്യാകരണ കാര്യങ്ങൾ – ഒക്കെ ഗ്രൂപ്പിന്ന് ആവും പോലെ മതി

4. മെഴുകുതിരി നിരീക്ഷണം [ നടുക്ക് ഒരു മെഴുകുതിരി കത്തിച്ചു വെക്കുക. നിരീക്ഷിക്കുക. അവരവർ കാണുന്ന മാറ്റങ്ങൾ, സ്ഥിതി നിരീക്ഷിച്ച് പറയുക 65-70 നിരീക്ഷണ വാക്യങ്ങൾ ശരാശരി കിട്ടും. 30-35 മിനുട്ട് സമയം വേണം. അപ്പോൾ ഗ്രൂപ്പിന്റെ ഉദ്ഘാടനം മെഴുകുതിരി കത്തിച്ച് തുടങ്ങാം. ഗ്രൂപ്പ് പ്രവർത്തനം അവസാനിക്കുമ്പോഴേക്ക് ഈ നിരീക്ഷണം പൂർത്തിയാക്കാം. ]

5. കടങ്കഥ , പഴംചൊല്ല്. ശൈലികൾ, കാവ്യശകലങ്ങൾ, തത്വചിന്താപരമായ വാക്യങ്ങൾ ഒക്കെയാവാം - ഓരോന്നായി പറയുക

6. കസേരക്കളി , മാണിക്യച്ചെമ്പഴുക്ക, ഒറ്റയക്കം ഇരട്ടയക്കം, 5 ഇരട്ടികൾ.... എന്നിങ്ങനെയുള്ള കളികൾ

7. കയ്യെഴുത്ത് മാസിക നിർമ്മാണം

8. നോട്ടിസ് ബോർഡ് നിർമ്മാണം

9. പോസ്റ്റർ നിർമ്മാണം, അറിയിപ്പുകൾ , നിർദ്ദേശങ്ങൾ എന്നിവ തയ്യാറാക്കൽ

10. ലഘു പരീക്ഷണങ്ങൾ

11. വായിച്ച് പുസ്തകത്തെ കുറിച്ച് പറയൽ [ മെല്ലെ മെല്ലെ എല്ലാവരും ഒരുങ്ങും ]

12. ഭൂപടം നോക്കി സ്ഥലം പറയൽ, അക്ഷാംശം രേഖാംശം കണ്ടെത്തൽ, നദികൾ കണ്ടെത്തൽ.....

13. ഗ്രാഫ് വരയ്ക്കൽ

14. വിലയിടൽ [ എല്ലാവരും ഒരോ സാധനങ്ങൾ പ്രദർശിപ്പിച്ച് അതിന്റെ വില – മൂല്യം കണക്കാക്കാനുള്ള വാദമുഖങ്ങളും ചർച്ചയും വിലയിടലും

15. ചിത്രം വരയ്ക്കൽ , കവിതയെഴുതൽ, കത്തെഴുതൽ

ഈ പട്ടിക എത്രയും വലുതാക്കാം. കുട്ടികൾ പഠിക്കുന്ന ക്ലാസ്, രക്ഷിതാക്കളുടെ മികവ്, കുട്ടികളുടെ മികവ്,

സമയലഭ്യത, സൗകര്യങ്ങൾ എന്നിവയൊക്കെ പരിശോധിച്ച് പ്രവർത്തനങ്ങൾ ഒരുക്കണം. രക്ഷിതാവുമൊത്ത് ചെയ്യുന്ന ഈ പ്രവർത്തനങ്ങൾ സ്കൂളിൽ പി ടി എ യിൽ ഒരിക്കൽ ചെയ്താൽ ഇതിന്റെ സാധ്യതകൾ മനസ്സിലാവുകയും അതൊക്കെയും വീടുകളിൽ കുട്ടികളുമൊത്തിരുന്ന് രക്ഷിതാവിന്ന് വീട്ടിലെ എല്ലാവരും കൂടി - ഹാ വീടൊരു പാഠശാലയായി മാറും !! - ചെയ്യാനാവുകയും ചെയ്യും. വീടുകളിൽ മാത്രമല്ല, കുട്ടികൾ ഒത്തുചേരുന്നിടത്തൊക്കെ ഇത്തരം കളികൾ സാധ്യമാവുമ്പോൾ അത് കുട്ടിയുടെ ക്ലാസ്റൂം പ്രവർത്തനങ്ങളെ അത്യധികം സഹായിക്കും. ഏതു ക്ലാസിലേയും ഏതുകുട്ടിക്കും വീട്ടുകാർക്കും കൂട്ടുകാർക്കും ഇത് ചെയ്യാൻ ഒരു പ്രയാസവുമില്ല. ബോധപൂർവം തയ്യാറാവണമെന്നു മാത്രം. വെറുതെ നേരം കളയുന്ന വസ്ഥ ഉണ്ടാവില്ല. എന്നാൽ ഇതൊക്കെയും കളികളും പഠനവും ആയി രസകരമാവുകയും ചെയ്യും.

പത്താം ക്ലാസിലെ 'പ്ലാവിലക്കഞ്ഞി ' എന്ന പാഠവുമായി ബന്ധപ്പെട്ട ഗൃഹപാഠസാധ്യത നോക്കൂ

ഗ്രൂപ്പ് : വീട്ടിലെ 4-5 പേർ [ അടുത്ത വീട്ടിലെ ആളുകളെ കൂടി കൂട്ടാമെങ്കിൽ 7-8 പേർ. സവിശേഷ തയ്യാറെടുപ്പുകൾ ഒന്നും വേണ്ട. പ്രയാസമില്ലെങ്കിൽ രക്ഷിതാവ് ഒന്നു തയ്യാറെടുക്കട്ടെ. അറിയുന്ന കാര്യങ്ങൾ ആത്മാർഥമായി പങ്കുവെക്കുകയേ വേണ്ടൂ. കളി ഒരു ഭാരമാവരുത് ആർക്കും !

പ്രവർത്തനം

1. കഥ വായന – പ്ലാവിലക്കഞ്ഞി

2. തകഴി ശിവശങ്കരപ്പിള്ളയെ കുറിച്ച് എന്തറിയാം - ഓരോരുത്തരും ഓരോവാക്യം [ ജീവചരിത്രം, കൃതികൾ , അവാർഡുകൾ ഒക്കെ വരും ]

3. കഥയിലെ കഥാപാത്രങ്ങലുടെ പേരുമറയൽ

4. ഏറ്റവും ഇഷ്ടപ്പെട്ട കഥാപാത്രം - കാരണങ്ങൾ പറയൽ

5. സംഭവങ്ങൾ ക്രമത്തിൽ വിവരിക്കൽ – ഒരോരുത്തർ ഓരോന്ന് [ തെറ്റുകൾ പരിശോധിക്കണം തിരുത്തണം ]

6. പദങ്ങൾ : അർഥം പറയൽ , വാക്യപ്രയോഗം

7. പകരം പദം പറയൽ [ പ്രാദേശികപദങ്ങൾ ]

8. ചോദ്യം ഉത്തരം പയറ്റ്

9. കഥാപാത്രങ്ങളായി അഭിനയിക്കൽ – അഛനും അമ്മയും മുത്തശ്ശിയും ഒക്കെ ചേരുന്ന നാടകം എത്ര മനോഹരമായിരിക്കും !!

10. കഥയെക്കുറിച്ച് അഭിപ്രായം പറയൽ

11. സമാന ജീവിതകഥകൾ പറയൽ [ മുത്തശ്ശിക്കൊക്കെ എത്ര പറയാനുണ്ടാകും ! ]

12. ഇഷ്ടപ്പെട്ട വാക്യങ്ങൾ പറയൽ / പാട്ടുണ്ടാക്കൽ

13. സംഭാഷണങ്ങൾ നമ്മുടെ ഭാഷയിലേക്ക് മാറ്റിപ്പറയൽ

14. തകഴിയുടെ മറ്റു കഥകൾ / നോവലുകൾ വായനശാലയിൽ നിന്ന് കണ്ടെത്താൻ ചുമതലപ്പെടുത്തൽ
15. ഉത്തരം കിട്ടാതെ പോയവ അദ്ധ്യാപികയോട് ചോദിച്ച് മനസ്സിലാക്കി വരാൻ ചുമതല ഏൽപ്പിക്കൽ

ഇനിയുമുണ്ട്... ഇങ്ങനെയുള്ള സാധ്യതകൾ പ്രയോജനപ്പെടുത്തുന്നതിനേക്കാൾ വലിയ പഠവും ഗൃഹപാഠവും മറ്റെന്തുണ്ട്? ഒരിക്കൽ പരീക്ഷിച്ച് നോക്കൂ. നമ്മുടെ കുട്ടികളും രക്ഷിതാക്കളും ഒരുപാടൊരുപാട് മെച്ചപ്പെടുകയില്ലേ? 

ഗൃഹപാഠങ്ങള്‍

കുട്ടി ക്ളാസ്‌‌മുറിയില്‍ ഇരുന്ന് പഠിക്കുന്നതേക്കാള്‍ അധികസമയം വീട്ടിലിരുന്നാണ്` പഠിക്കുന്നതെന്ന് ആര്‍ക്കാണറിയാത്തത്?

മാറിവന്ന പഠനരീതിയും ക്ളാസ്‌‌റൂം പ്രവര്‍ത്തനങ്ങളും എന്തൊക്കെയായാലും പൊതുവെ നമ്മുടെ കുട്ടികളുടെ പഠനരീതിയില്‍ ഇതിന്നനിസൃതമായ മാറ്റങ്ങള്‍ രൂപം കൊണ്ടില്ല എന്നാണ്` അനുഭവം. [കുട്ടിയുടെ ആവശ്യത്തിനോ ആഗ്രഹത്തിനോ ഒന്നും പരിഗണന നല്കാതെ തന്നെ ] അധ്യാപികയുടെ നിര്‍ദ്ദേശപ്രകാരം ക്ളാസ്‌‌ മുറിയില്‍ ഗ്രൂപ്പ് പ്രവര്‍ത്തനങ്ങള്‍, ചര്‍ച്ച , ഇടപെടലുകള്‍, കൂട്ടിച്ചേര്‍ക്കലുകള്‍ , തിരുത്തലുകള്‍, അനുഭവങ്ങള്‍ പങ്കുവെക്കല്‍ ഒക്കെ ഉണ്ടെങ്കിലും ഇതിന്റെ തുടര്‍ച്ച വീട്ടു പഠനത്തില്‍ ഉണ്ടാകാറില്ല.

ക്ളാസ് മുറിയിലെ തുടര്‍ച്ച അതേ പടി വീടുകളില്‍ അസാധ്യമാണ്` എന്നത് വസ്തുതതന്നെ. എന്നാല്‍ പിന്നെ അതെങ്ങനെയായിരിക്കണം എന്നതിനെ കുറിച്ച് വേണ്ടത്ര ധാരണകള്‍ കുട്ടിക്ക് ലഭിക്കുന്നില്ല / നല്കുന്നില്ല . അതുകൊണ്ടുതന്നെ ഗൃഹപഠനം ഇപ്പോഴും പരമ്പരാഗത ക്രമത്തില്‍ ഒതുങ്ങിപ്പോകുന്നു. കുട്ടി സ്കൂള്‍ സമയത്തേക്കാള്‍ അധികസമയം വീട്ടുപഠനത്തിലാണെന്നത് അറിയുമ്പോള്‍ ഇതു നിസ്സാരമായി കാണാനും ആവില്ല.

ഗൃഹപഠനത്തില്‍ ഉള്‍പ്പെടുന്നത്

    അധ്യാപിക ക്ളാസ് മുറിയില്‍ വെച്ച് നല്കുന്ന ഃഒമെവൊര്ക് കള്‍

    കുട്ടി സ്വയമേവ തയ്യാറാവുന്നത് - പരീക്ഷക്ക് , അധികഅറിവ് ആഗ്രഹിച്ച് [ ഇതില്‍ ഏറിയ പങ്കും പരീക്ഷാപ്പഠിപ്പ് തന്നെ ]

    കുട്ടിയുടെ സര്‍ഗാത്മക [ കല- ശാസ്ത്രം ] പ്രവര്‍ത്തനങ്ങള്‍

ഇതില്‍ ഏറ്റവും കൂടുതല്‍ കുട്ടികള്‍ പ്രവര്‍ത്തിക്കുന്നത് ആദ്യ ഇനത്തില്‍ത്തന്നെ. അതാകട്ടെ ക്ളാസ്‌‌റൂം പ്രവര്‍ത്തനത്തിന്റെ ക്രിയാരഹിതമായ പൂരണങ്ങള്‍ മാത്രം. ഒരു കണക്ക് ചെയ്യല്‍, ഒരു കുറിപ്പ് തയാറാക്കല്‍ /പകര്‍ത്തിയെഴുതല്‍, ഒരു ചെറിയ ഭാഗം വായന, ഒരു ചിത്രം വരയ്ക്കല്‍, ചില ഡാറ്റ ശേഖരിക്കല്‍ , ക്രമപ്പെടുത്തല്‍, മന:പ്പാഠമാക്കല്‍, ഉത്തരം പഠിക്കല്‍ [ ഉത്തരം പഠിക്കാന്‍ മാത്രം ആവശ്യപ്പെടുന്നതുകൊണ്ട് ചോദ്യം പഠിക്കാതിരിക്കുകയും അതെന്തെന്നുപോലും അറിയാതെ ഉത്തരം മാത്രം മന:പ്പാഠമാക്കുകയും ചെയ്യുന്ന രീതിയൊന്നും ഇപ്പോഴും മാറിയിട്ടില്ലല്ലോ . അതൊകൊണ്ടാണല്ലോ പലരും ചോദ്യപ്പേപ്പറിലെ ചോദ്യപാഠങ്ങള്‍ വായിച്ച് മനസ്സിലാക്കാനുള്ള ക്ഷമപോലും കാണിക്കതിരിക്കുന്നത്. ] എന്നിങ്ങനെ ഉള്ളവയില്‍ ഒതുങ്ങുന്നു.ഇതാകട്ടെ ക്ളാസ് മുറിയില്‍ നടന്ന പഠന തന്ത്രങ്ങളോ , പ്രക്രിയകളോ ഒന്നും വീട്ടില്‍ സാധ്യമല്ലെന്നിരിക്കേ കുട്ടി ചെയ്യേണ്ടിവരുമ്പോള്‍ അത് ക്രിയാരഹിതമായി / നിര്‍ജ്ജീവമായിപ്പോകയും ചെയ്യുന്നു. അതായത് കുട്ടിയുടെ അധികസമയപഠനവും [ഗാര്‍ഹികം] ഇപ്പോഴും പാഠ്യ പദ്ധതി ആഗ്രഹിക്കും പോലെ ശാസ്ത്രീയമാക്കപെട്ടിട്ടില്ല എന്നല്ലേ!

ഇതിന്ന് രണ്ടു തരത്തില്‍ സമീപനം പ്രതീക്ഷിക്കുന്നു.

    നല്കുന്ന ഗൃഹപാഠങ്ങളില്‍ അധ്യാപിക മാറ്റം വരുത്തണം. [ അതിനാവശ്യമായ പരിശീലനം അവര്‍ക്ക് നല്‍കണം]

    ഗൃഹപഠനത്തില്‍ കുട്ടിക്ക് ശാസ്ത്രീയമായ വൈദഗ്ധ്യം നല്കണം. [ ക്ളാസിലെ പഠനവും ഗൃഹപഠനവും വെവ്വേറേ ഡിസൈന്‍ ചെയ്യപ്പെടണം. ]

സമീപനങ്ങള്‍ക്ക് അടിസ്ഥാനം

    ഗൃഹപാഠം എന്നാലെന്ത്?

    ഗൃഹപാഠം ഉദ്ദേശ്യലക്ഷ്യങ്ങള്‍

    കുട്ടിക്ക് സ്വയം നിവര്‍ത്തിപ്പിക്കാവുന്ന തന്ത്രങ്ങള്‍

    വീടും - ക്ളാസും ബന്ധിപ്പിക്കാവുന്ന കണ്ണികള്‍

എന്നിങ്ങനെയായിരിക്കണം. ഈ സംഗതികളിലുള്ള പ്രയോഗങ്ങള്‍ പ്രാവര്‍ത്തികമാകുമ്പോള്‍

    വീട്ടിലെ പഠനം വളരെ വളരെ പ്രയോജനപ്രദമാകും.

    \' കുട്ടി വീട്ടില്‍ വന്നാല്‍ പിന്നെ എഴുത്തോടെഴുത്താ...... പഠിക്കാന്‍ നേരല്യാ...\' എന്ന ആവലാതി ഒഴിവാക്കാം

    രക്ഷിതാക്കളെ കുറേകൂടി പ്രത്യക്ഷ പഠനവുമായി അടുപ്പിക്കാം

    സ്കൂള്‍കാലം വിട്ടാലും കുട്ടിയില്‍ അറിവ് തേടാനുള്ള ഒരു സാംസ്കാരിക ഭൂമിക നിര്‍മ്മിക്കാം

പുതുപുസ്തകങ്ങളുടെ തൂമണം

പുതുവർഷം.പുത്തൻ പുസ്തകങ്ങൾ. മുഴുവൻ കേരളീയർക്കും അവകാശപ്പെടാവുന്ന ഓര്‍മ്മകളും അനുഭൂതികലുമാണിവ.വിദ്യാഭ്യാസവുമായി ബന്ധപ്പെട്ട എറ്റവും കാൽ‌പ്പനികമായ സങ്കൽ‌പ്പം പുത്തൻ പുസ്തകങ്ങളുടെ മണം തന്നെയാണ്. ഗന്ധപരമായ സവേദന തീക്ഷ്ണത മലയാളിയുടെ സവിശേഷതയാണെന്നുതന്നെ പറയാം. കാർഷികരംഗത്തുള്ള മലയാളിയുടെ സാംസ്കാരികമേൽക്കോയ്മയുടെ അനുഭവങ്ങൾ ജീനുകളിലൂടെ ഇന്നും ഓരോമലയാളിയുടെയും ബോധങ്ങളിൽ നിലനിൽക്കുന്നുവെന്നതുതന്നെയാവാം ഇതിന്ന് കാരണമായി പറയാവുന്നത്. പുത്തന്‍ പുസ്തകങ്ങളുടെ തൂമണങ്ങളുമായി വീണ്ടും ഒരു അധ്യയന വർഷം ആരംഭിക്കുന്നു.

 ഇനി പഠിക്കാൻ തുടങ്ങാം

ഒന്നാം ചുവട്

പഠനം തുടങ്ങാനുള്ള നമ്മുടെ സ്വന്തം കൈമുതൽ പുതായി വാങ്ങിയ പാഠപുസ്തകങ്ങളും നേരത്തെ പഠിച്ച പാഠങ്ങളുമാണ്. ഇവ ഇനം തിരിച്ച് മനസ്സിലാക്കി വേണം പഠിക്കാനൊരുങ്ങാൻ.പരസ്പര ബന്ധിതങ്ങളാണ് പാഠങ്ങളൊക്കെത്തന്നെയെങ്കിലും നമ്മുടെ സാബ്രദായികരീതികൾ ഈ ബന്ധങ്ങളെ വേണ്ടത്ര പ്രയോജനപ്പെടുത്താത്തവയാണ്. പാഠബന്ധങ്ങൾ ഉയർന്ന ക്ലാസുകളിൽ അലപ്പാൽ‌പ്പം ശ്രദ്ധിക്കാറുണ്ടെങ്കിലും